Sarà lu faugnu ca ‘nfoca li strati,
lu friddu ti ‘nviernu, lu soli ti stati,
sarà na miseria ca no si capesci,
sarà la malaria … Ma comu mi ‘ncresci!
 
Mi ‘ncresi cu ‘mbevu, mi ‘ncresci cu mangiu,
cu dormu, cu m’azu, cu cangiu e cu scangiu,
cu ritu, cu chiangu, cu mi ndi ‘nammoru;
mi ‘ncresi cu campu e mi ‘ncresi cu moru!
 
 
Può darsi ca è viziu o ca è malatia,
ma quantu mi puzza a me la fatìa.
Ca po’, ci nci pienzi, quant’anni ha’ campari?
Lu tiempu ca passa lu pirdi a fatiari?
Nci sta ci si ‘rraggia, nci sta ci si stizza,
ma a me no mi ‘ncodda, a me no mi ‘nghizza.
 
Ndi vali la pena ca unu si ‘mbuca.
Ci l’acqua mi vagna, lu soli mi ‘ssuca.
No mi ‘llicrinescu, no fazzu vilenu;
ci si po’ scanzari, facimindi a menu,
ca tanta ti ‘mbili, ti lemba o ti brocca
ogni acqua ca corri a mari li tocca!
 
Ci ‘nquarche foresto si mena a fatiari,
ma ce vi ndi fotti? Lassatulu fari!
No servi la ugghina, no occorri la mazza,
ma basta lu tiempu: pur’iddu si cazza!
 
Mai sia cu la pressa! Vagnu’, chianu chianu!
Ma ce vi pinzati ca stamu a Milanu?
Ma ce “evoluzioni”! Ma quali “progressu”!
A Brindisi, tanta, campamu lo stessu.
 
Sarà lu faugnu? Sarà l’aria toci?
Stu cielu, stu mari, stu soli ca coci?
Sarà la miseria? Sarà la malaria?
Sarà ca nci sta quarche cosa ‘ntra l’aria?
 
Certu è ca:
li mazzi, li cruessi, li tritti e li stuerti,
li bueni, li fessi, li vivi e li muerti,
li beddi, li brutti, li cani e li jatti,

a Brindisi tutti cussì simu fatti!!


Commenti

Bellissima

By antonio guadalupi (non verificato)


Aggiungi un commento

Plain text

  • Nessun tag HTML consentito.
  • Indirizzi web o e-mail vengono trasformati in link automaticamente
  • Linee e paragrafi vanno a capo automaticamente.